Kamatoaaki Inanon Te Boraraoi (#10409)

Ko kamimitongaki, O Uean te aki tootoki, ao te Tia Karikii aono, ao te Tia Buabuai taian rii aika a tabe n mka!  I tataro Nakoim, n Aram are rinanona Ko a tia ni weteia nikabane kaain aonaaba nakon oraitanin Ueam ao Mimitongim, ao ni kairiia Am toro nakon nanoaan oon Am kakatekeraoi ao Am akoi, warekai bwa temanna naba aroia ake a kaaki tangiran bwaai nikabane ma ti Ngkoe, ao n tia n tei ni waaki Nakoim, ao n aki tuukaki mwanangaia man taian kangaanga ake Ko a tia ni baireia ibukiia, man rairaki ni kaineti nakon Am bwaintangira. 
I a tia n taua, O au Uea, bwain tauan Am kakabwaia, ao n teimatoa ni kanimwakaa baiu nakon rabin kamwarain Am bwaintituaraoi. Karuoa, ngkanne, nako aou, man nangin Am tituaraoi, te bwai ae e na kaitiaka mai nanou uringakin riki temanna ma bon ti Ngkoe, ao karaoai bwa nna  konaa n rairaki nakon Teuare Ngaia Boton nanoia te botannaomata nikabane, are E a tia ni kaitaraaki irouia taan teirake ni kakiriwe, ake a tia n urua Am boraraoi, ao n aki Kakoauako ao n Am kanikinaa. 
Tai tuuka mai irou, O au Uea, boiararan Am kunnikai n Am Bong, ao tai kakeaa mai irou ikeiken Am Kaotioti ni kaotin otanakon tauran Moam. Ko bon mwaaka ni karaoa are Ko kukurei iai. Akea ae e konaa ni kaitaraa Nanom, ke ni katoka te bwai are Ko a tia ni kataua ni Korakoram. 
Akea te Atua bwa ti Ngkoe, te Kabanea ni Mwaaka, te Kabanea ni Wanawana.

-Bahá'u'lláh
-----------------------

Kamatoaaki Inanon Te Boraraoi (#13704)

Kamatoai waera, O te Uea, inanon Kawaim ao Ko na kakorakorai nanora inanon te ongotaeka Nakoim. Rairi moara nakon tamaroan Am katiteuana, ao kakukurei bwanibwanra ma kanikinaean Am katiteuana n tamnei. Katamaroai rabwatara ma kamwarain Am kakabwaia, ao kanakoa mai matara rabunanimatan kaakaraoan ae e bure, ao anganiira mwangkon Am 
karaoiroi; bwa oioia aomata nikabane a na kona n anenei Neboam i matan te kataratara ibukin Rianakon Taraakim. Kaotiko ngkanne Ngkoe, O te Uea, man Am taetaenikawai ae e nanoanga ao miterion Maium n tamnei, bwa e aonga angin te tataro ae e tabu n ninii tamneira—te tataro ae e na mwemwerake iaon taian taeka ao manintaeka ao n riaoi nako aabebeten tangin taian tiribware ao kakarongoa—bwa a aonga bwaai nikabane n ikotaki nakon te aakea i moan kaotiotin otanakon Tamaroam.
Te Uea! Aikai tooro ake a tia n tiku n teimatoa ni matoa ao n nene inanon Am Boraraoi ao Am Tetemanti, ake a tia n taua ni kamatoa nakon roobun te teimatoa inanon Am Aro ao ni kanimwakai baia nakon rabin kamwarain Kakannatom. Buokiia, O te Uea, n Am Karaoiroi, kamatoaia ni Korakoram ao kamarurunga nanoia n ongotaeka Nakoim.
Bon Ngkoe te Tia Kabwarai Buure, te Tia Karaoiroi.

-`Abdu'l-Bahá
-----------------------

Kamatoaaki Inanon Te Boraraoi (#16143)

O au Uea ao au Kantaninga! Buokia aika a tangiraki Iroum bwa a na teimatoa inanon Am Boraraoi ae moan te korakora, n tiku ni kakaonimaki nakon Am Aro ae e kaotaki, ao n irii nanon taian kaetieti ake Ko a tia ni kawenei ibukiia inanon Am Boki ae e Otanako; bwa a aonga n riki bwa baena ibukin te kairiiri ao taura ibukin te Runga are i eta, bwa boton Am niniwana ae akea tiana, ao itoi aika a kairiiri, ngke a tabe n otanako rikaaki man te karawa ae e rietaata. Ni koaua, bon Ngkoe ae Akea Iaon Korakoram, te Kabanea ni Mwaaka, te Kabanea ni Korakora.

-`Abdu'l-Bahá
-----------------------

Kamatoaaki Inanon Te Boraraoi (#16144)

O te Atua, Atuau! Otangania Am toro aika a onimakinaki man riaboron bwanaan nanoia ao te kaibwabwaru, kamanoia ma te mata n tantanii n Am tangira n akoi man nikabane nano ni kakatekebuaka nikabane, te riribai, ao te bakantang, kamanoia inanon te nono ae e matoatoa ae e aki kona n niniaki n Am tararua ao, ni kawakinaki raoi man kainikateben te nanououa, karikiia bwa taan kaotaa Kanikinaeam ae e mimitong, kaotai moaia n otan buraenimata ake a otanako man Bonginaumarin Am Katiteuana n Tamnei, kakukurei nanoia ma taian kibu ake a kaotaki man Am Abaniuea ae e Tabu, kamatoai nanoia ni Korakoram ae e mwaaka are e roko man Am Abanuea ae e Mimitong. Ngkoe ni koaua te Kabanea n Tituaraoi, te Tia Kamanomano, Te Kabanea ni Korakora, te Tia Karaoiroi!

-`Abdu'l-Bahá
-----------------------

Kamatoaaki Inanon Te Boraraoi (#10410)

Ngkoe ae Atuan te Nanoanga!  Bon Am bwai te karabwaaki bwa Ko a tia ni kautai ma n anganai te atatai.  Ko a tia n anganai matau n taratara ao Ko aakoai n taningau n ongo, Ko a tia ni kairai nakon Abanueam ao ni kairai nakon Kawaim.  Ko a tia ni kaota nakoiu te kawaiu ae e eti ao ni karikai bwa nna rinnako inanon te aake ni kamaiu. O te Atua! Kaawakinai bwa Nna teimatoa ao karikai bwa nna nene ao n aki kona ni mwaing nako.  Kamanoai man taian kataitai aika a korakora ao katanai inanon nonon Am Boraraoi ao Am Tetemanti ae e matoatoa ao n tia ni kamatoaaki. Ngkoe te Korakora. Ngkoe te Noraaba. Ngkoe te Tia Ongo. 
O Ngkoe Te Atua ae Ko Nanoanga.  Anganai nanou ae, ai aron te kiraati, ae e na kaotaaki n ootan Am tangira, ao kataua ibukiu taian iango ake a na kona n onika te aonaaba aio nakon te onaroka n rooti rinanon bwaronakon te karaoiroi mai karawa. 
Bon Ngkoe te Nanoanga, te Nanoanga. Bon Ngkoe te Atua ae Moan te Korakora Am Akoi.

-`Abdu'l-Bahá
-----------------------

